條條大路通姆西 - 曾志豪
好嘢好嘢！香港終於有自己的手信，唔駛硬食老婆餅，又唔駛夾硬逼自己讀唔擅長的「草泥馬」。字正腔圓，香港本土，自治運動供奉首選，「路姆西」之鹹濕色狼嗒外婆！
呢隻讀出嚟完全係粵語鏗鏘粗口的「路姆西」狼公仔，一丟成名，全城熱捧，斷市補貨，要等出年。可見香港這個城市實在有太多人想丟路姆西，我地搵嚟「講大咗」民意調查研究中心，粗略估計有689萬人想丟呢隻路姆西。我地亦都問米訪問咗「狼嗒外婆小紅帽」的作者，佢表示，呢隻狼同狼英形神俱似，如有雷同，並非巧合。
先嚟「小紅帽」已經無得輸，舉頭三尺、紅色上頭，不過人地小紅帽戴得光明正大，呢隻狼就收收埋埋。
大灰狼食咗外婆死口唔認扮好人想呃小紅帽，基本上個對白就係咁：「我無講過我無食到你外婆。至於點解你外婆會喺我個肚裏面，呢個係有一籃子嘅原因，基於保密原則，我唔可以透露。」
至於個外婆，其實係有名㗎，佢叫「林鄭外婆」，近得路姆西太耐，硬食污糟嘢，遲早被隻狼嗒埋落肚。
呢排政改諮詢，「林鄭外婆」親力親為，仲要俾「沃文」用把口掟汽油彈，「林鄭外婆」的民望，就嚟俾隻狼嗒晒落肚；唔係同化，而係被隻狼消化。
《牛津道字典》，Oxford Road Dictionary，最新收錄：「買唔到路姆西，天無絕人之路，所謂條條大路通姆西。」
《康熙來了字典》亦有收錄：「世上本無路，丟姆西的人多了，路便出來了。」路姆西，諧音也，政改條路無西選也！
「路姆西」者，「路見不平、拇指向下、西環收嘢！」
发自我的 iPad
没有评论:
发表评论