电子邮件关注

2017年8月4日星期五

【出Post自嘲】設計師刷存在感 書展簽名會零人出席達成 | 2017-08-04 | | 蘋果日報

【出Post自嘲】設計師刷存在感 書展簽名會零人出席達成 | 2017-08-04 | | 蘋果日報

【出Post自嘲】設計師刷存在感 書展簽名會零人出席達成

facebook世界萬家爭鳴,即使粉絲專頁like數夠多,唔keep住日日出post,真係分分鐘被世界遺棄,很可怕。網絡後浪推前浪,刷存在感成了很多版主的例行公事。專營動畫設計的DDED,專頁like數超過五萬,又如何?版主Albert最近喪出post自嘲無人識,似乎係上演以退為進,引人注意的戲碼。我問:「存在感對你來講係乜?陽光?空氣?無咗唔得?做乜係咁衝出來?衝完粉絲真係多咗?」佢答:「出咗呢啲post,粉絲無少到,個人明顯高咗、大隻咗,存在感返咗埋嚟!呀~~」得啦得啦,咪背星爺電影對白敷衍我。


人潮越文靜越變得不受理睬,自己要搞出意外。DDED的Albert決定自嘲,以退為進。

「你憑乜覺得刷就有存在感?」

「憑我徹底的勇氣。」

「……」

原來成日靚抽時事製作2D起格影片嘅佢,最近把將無人識、產品無人買的慘痛經歷化為黑色幽默動畫或插圖,以自己為主角,博大家派like。「上年書展,有人將我認錯係于日辰(高登作家小姓奴),叫我簽名,我有照簽。」佢又試過變咗「送禮勤」,帶同自己創作的figure公仔去設計師聚會送人,聚會完結,figure被遺下,慘到烈。又有人曾經send email同佢傾合作,可惜對方真正想搵的係網絡紅人「大大與小妹」(90後情侶插畫師)的小妹。佢扮認真話:「用咗好耐時間平復,心靈受到好大打擊,好想將呢件事畫出來當發洩,又可以順便出post呃like。」慢慢地呢個人不斷自爆,往傷口灑鹽自嘲戲謔。「都係俾人笑吓,自己又笑吓,老實唔係真係刻意刷存在感。」唔知係咪因為睇人「X街」最開心,啲post真係好好笑,加上樣樣衰衰,猥猥褻褻的方面造型公仔,係幾令人期待睇佢有更多瘀事分享嘅。


佢以「窮到賣底褲」為口號賣底褲,但其實印製底褲及買扭蛋機等成本不輕,賣咗九成都無錢賺。


方面MK仔動畫配上Albert刻意chok出來的衰聲,睇一次笑兩次。


一心帶自己作品送給其他設計師,點知完場發現自己變咗「送禮勤」,惟有幽自己一默,畫出來畀大家笑吓。

剛過去的書展,佢做咗兩個創舉,第一係搞咗場零人出席簽名會,一小時簽名會真係無人去,半個都無。咁無存在感的假象,係佢精心策劃。「揀無人得閒來嘅時間搞,書展第一日晏晝三點,返工嘅人一定來唔到。專登低調宣傳,又呼籲大家唔好來。」無人來,個心真係無碎到一地都係?「無,只係覺得幾好笑。我其實係模仿日本YouTuber Shibatar,佢都搞過一場無人去嘅簽名會。其實無人來,有人來我都開心,根本就係無敵嘅狀態。」

書展期間,呢位仁兄無新書但日日蒲頭,竟然係為咗賣底褲,仲唔係怕被忘記至放大來演吧?搶focus搶到出面喎!「純粹想做啲非主流嘅事,香港地唔係即時賺到錢嘅生意,好多人都唔做,我專做呢啲,專做蝕本生意。」用扭蛋機賣底褲,佢話係一套經驗,賣嘅係整個過程。睇你會唔會好彩抽中有屎漬印花嗰款。諗落無聊,實質都係無聊,之但係整嗰個開心,抽嗰位高興,旁人又有乜好講?

記者:葉青霞
攝影:王國輝

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily



Z88

没有评论:

发表评论