十萬元戶大增
2012年02月28日
爽報股神何車每日推薦一股，每早都起碼升一輪，散戶真係服咗佢，但何車最鍾意之事，並非講股寫股，而係研究對聯，最近左丁山寫余伯樂對聯，何車睇完又睇，話係近年「 GG細語」最有趣味嘅兩篇，死啦，其他稿件原來不入他的法眼？
此日何車引述鳳凰 衞視節目出上聯：「天鳳凰，地鳳凰，天地鳳凰聚鳳凰」，下聯對死人，至今搵唔到！天鳳凰指天上之鳳凰 衞視，地鳳凰指湖南省鳳凰城，此地有藝術鳳凰黃永玉，黃永玉在鳳凰城可以收睇鳳凰 衞視，故有「天鳳凰，地鳳凰，天地鳳凰聚鳳凰」之上聯。各方君子雅士如有下聯，請告知左丁山與何車。另外，「古堡好敦倫，敦倫總是倫敦好」之聯，有不少讀者來郵應對，皆有牽強之處，一位老新亞校友植漢民來郵三次，最後修正之下聯為「新居求典雅，典雅何須雅典求」，未知余伯樂認為如何？今天之雅典城不時發生騷亂反政府示威，典雅何須雅典求，幾適合目前形勢。
講番昨日之香港家庭收入變化，由 2001至 2011年，香港富人家庭大增，除咗最低收入一批（少於四千元）家庭嘅數目有所增加之外，整個家庭收入趨勢十分好。十年間，香港增加 315,384戶，增至 2011年之 2,368,796戶，每戶平均 2.9人。三十一萬五千新增家庭嘅收入分佈如何？月入超過三萬元嘅高收入家庭增加咗 228,796戶，佔新增家庭之 72.5%，月入少於一萬元之新增家庭有 70413戶，佔 22.3%，中間收入（一萬至三萬）新增家庭有 16175戶，佔 5.1%，從分佈嚟睇，香港住戶收入向上移，值得恭喜，而增幅最大嘅，竟然係月入超過十萬元嘅富戶，由 2001年之 66851戶升至 111,428戶，增幅達 66.7%，呢個情況可以解釋得到，點解香港樓價雖高，仍然有承接力，亦可以話俾林鄭月娥局長聽，香港人收入向上移，換一層較大面積嘅私樓有好大需求，甚麼限呎限量住宅單位，根本與市場期望不符，與人口普查嘅收入分佈趨勢不符。在 2001年，收入低於二萬元嘅家庭佔 52.3%，在 2011年，收入高於二萬元嘅家庭佔 52.5%，希望呢個趨勢持續下去！
（左丁山）
没有评论:
发表评论