电子邮件关注

2017年2月10日星期五

蘋果日報- 【西遊記】做人做到碧咸咁 - 方俊傑

蘋果日報- 【西遊記】做人做到碧咸咁 - 方俊傑

【西遊記】做人做到碧咸咁 - 方俊傑


最近碧咸的電郵內容遭足球解密(Football Leaks)流出,指出碧咸想以做善事去博取被封為爵士,未能獲選的他卻發難鬧委員會是人渣。


相比謝拉特(中)及林柏特(右),其實碧咸算是要乜有乜,竟為着虛名一個而名譽掃地。


碧咸曾經對老婆Victoria不忠不是死罪,一次沽名釣譽卻令他千年道行一朝喪。


早在職業生涯初期,碧咸已贏得所有足球員夢寐以求的歐聯冠軍,可謂少年得志。

【文化籽:西遊記】
越來越信,人有命。像林柏特,身為一個中場球員,可以保持車路士的入球總數歷史紀錄,英超贏過,歐聯贏過,樣又唔係醜,根本就係英格蘭球王質素,偏偏擺脫不了二奶命格。在國家隊,聲名不及謝拉特;在球會,長期站在泰利之後;好了,退休啦,仲唔至少做到一個星期主角?都要撞正碧咸同期傳出醜聞,焦點又去到萬人迷身上。

自爆在接近二十年的模範婚姻中,曾經犯過錯,但懂得回頭是岸。無所謂,反正大部份人都唔妥佢老婆Victoria,見到碧咸不忠過,較厚道的,可能說一句意料之內便輕輕帶過;比較真誠的,應該早早鼓掌慶賀。被黑客盜取電郵後爆料,指碧咸做慈善唔肯用自己錢,先夠cheap;更抵死是做善事原來全為沽名釣譽,一心希望換個爵士銜頭來威威,一知道做唔到,即時爆粗發脾氣。偽善得有如岳不群,才是死罪。千年道行一朝喪,想真真正正被封爵,恐怕要等到領取終身成就獎的年紀,大家都忘記了今天的時候。

本來,碧咸的種種舉動,都是有血有肉正常人類的正常反應,不是傷天害理。只是,近十年八載,碧咸將自己的形象塑造到接近完美,直達神聖,當真相曝光,落差竟然如此巨大,很難叫一般受眾毫不反感。何況,世界上有很多花生友,最喜歡欣賞別人折墮,見到碧咸出事,怎可能抗拒到幸災樂禍的誘惑?只不過踩多兩腳,已經很留力了。我就嘗試用一個較為同情的角度,為碧咸講少少好說話。

做人做到碧咸咁,其實,好悶㗎!你可能立即反彈:「唔係啩,有錢有名氣又靚仔又勁多人錫仲有老婆仔女,要乜有乜,想點就點,咁都悶?我咪應該衝上ICC頂樓跳下來?」唉,你無錢,你窮,所以要為生活而拚命,咪有個明確目標去追求囉。你無女,你宅,所以要為解決性需要而覓食,咪有個明確目標去進發囉。人生有目標去追求,生存就有意義啦。碧咸不同。講錢,他的身家拍得住英女皇,就算由現在開始完全沒有入息,子女又不事生產,也可以安枕無憂好幾代。講女,要偷食,碧咸使落手落腳追?開句聲,燕瘦環肥排住隊等寵幸啦,碧咸搞女,似係碧咸蝕底呀,咁咪失去患得患失的樂趣囉。講名氣,退休多年,仍然是全球最知名足球員,就算你唔知越位陷阱是甚麼,都必定聽過碧咸個名。還有甚麼可以追求呀?十七歲出道,贏過英超贏過西甲贏過法甲贏過歐聯連美職聯都贏埋,如果碧咸教波,或者還可以發一發夢,嘗試一下以領隊身份為英格蘭贏一贏從未到手的大賽獎盃,但碧咸的目光更遠大,情願花多幾年間去籌備,一跳就跳去做球會班主。現階段根本無事可忙,難怪只可以諗諗如何追個Sir字來打發時間。

人類就是犯賤。備受萬人景仰的,尚且會為虛名一個而名譽掃地,你和我這些凡夫俗子,又怎可能有本事去平復內心慾望?想一想,相對於做碧咸,或者做謝拉特,做林柏特,可能真的最寫意。獎盃,林柏特一樣唔少。碧咸輸波,會被費格遜飛靴傷面,被臭罵掛住拍拖掛住做明星;林柏特輸波呢?捱罵的,是其他隊友。謝拉特被利物浦半放棄,因為背負住忠心耿耿的光環,不可能轉投其他歐洲強隊,只可以承受一生人連一個聯賽冠軍都未贏過的遺憾;林柏特離開車路士後,被借去車路士的主要競爭對手曼城,卻心安理得。退休了?不用怕,未做領隊之前,掟掟飛鏢足夠過日辰。只不過,叫你唔好咁蠢去做個為老闆付出一切的謝拉特,好容易;叫你唔好試圖去做個樣樣事也贏到最盡的碧咸,卻很困難。沒有太多人一出世便打算做個林柏特,也沒有太多人在長大後仍滿足於自己只是個林柏特。雖然,我知道,大部份人,包括我,其實最想最想做到泰利。泰利是甚麼?泰利就是幸運到一出道,便泊到個好碼頭,老闆大力投資,安安份份打好一份工,便一帆風順追求到可以追求的所有榮耀。過程中,甚至有空閒去偷食隊友老婆,不怕損壞形象不怕影響事業。

幾時都話,無拘無束,最過癮。

Profile:方俊傑觀塘長大,壹仔打滾,偏愛西片、西劇、中日韓美女。利物浦悲慘球迷,非西人一個。

編輯:梁浩維

美術:楊永昌

上一則: 【文化籽】由維多利亞藍到土豪金

下一則: 【讀書好×果籽】薯粉還是奶粉,是品味問題! - 劉細良



I

没有评论:

发表评论