电子邮件关注

2017年2月23日星期四

隔牆有耳:應驗「要睇少啲戲」《費城故事》洗腦
少年鳴煒 讀Law 9年冇高潮 - 李八方 | 2017-02-24 | | 蘋果日報

隔牆有耳:應驗「要睇少啲戲」《費城故事》洗腦<br/>少年鳴煒 讀Law 9年冇高潮 - 李八方 | 2017-02-24 | | 蘋果日報

隔牆有耳:應驗「要睇少啲戲」《費城故事》洗腦 少年鳴煒 讀Law 9年冇高潮 - 李八方

盛傳為林鄭月娥助選嘅「Package男神」劉鳴煒,噚日應貿發局邀請就「前路如果,你有得?!」為題同學生分享。女主持問佢最近忙乜?男神冇提任何助選工作,只係話搞青年事務已佔佢一周七日時間,要犧牲唔少社交活動,但依然保持瞓覺8粒鐘。佢仲自爆少年時被湯漢斯主演嘅《費城故事》洗腦,一度想做律師,但因為太悶冇入行。
佢喺論壇提到請人時學業成績唔係最重要,反而最重視應徵人士對份工有無真正興趣同係咪投入,因職場應用到嘅學校知識或僅三成,工作環境最重要係學新嘢,坦言可以將夢想同職業成功結合嘅人係「極少數」,學生最重要了解自己享受做乜,唔主張年輕人十幾歲定下目標後唔再改變。

「比較悶 難發揮所長」

佢以自己為例話,17歲時志願係做律師,因為當時被《費城故事》洗咗腦,結果17至26歲期間,讀咗法律學士、碩士同博士學位,但最後連一日執業律師都冇做,因為讀學士第二年夏天,已經知道唔想做律師,「因為比較悶,唔能夠發揮所長」,因為自己只對法律理論同哲學有興趣,如果堅持做律師,「只會做一個好悶、好無心機嘅律師」,但笑言若能「穿梭時空」,或重新考慮加入大狀行業。
1993年嘅《費城故事》係講述是一名律師嘅維權故事,飾演律師嘅湯漢斯仲憑此片奪得奥斯卡最佳男主角,估唔到迷倒埋那些年嘅少年男神。

「有啲嘢係要逼出嚟」

男神噚日仲鼓勵年輕人勇於嘗試自己唔鍾意嘅嘢,若有壓力就同屋企人同朋友分享,自己就最愛以運動減壓,最近應一組織邀請做外展訓練,爬上四、五層樓高嘅木柱後再行鋼線,坦言「開始即腳震」,擔心「真係會跌死」,最終覺得幾好玩,「有啲嘢係要俾人逼出嚟」。
被認定含住金鎖匙出世嘅佢強調「贏在起跑線,絕對可以輸在終點」,指若有人唔想喺條起跑線比賽,「你都未必贏得開心」;咁若然有人背景冇咁強大優勢,點樣可以有競爭力?佢話喎:「用番龜兔賽跑比喻,其實隻烏龜好簡單箒,就係同隻白兔鬥快游水囉!」強調每個人都有長處。唔知選情比林鄭落後嘅薯片叔,聽完有冇啟發?

李八方



I

没有评论:

发表评论