不願回憶 - 左丁山
今日六四，左丁山本來要出席一個追思彌撒。前輩的妻子C夫人，幾個月前見過佢，佢80幾歲，精神狀態幾好，身體應無問題，點知到上星期三突然得知佢已因癌症擴散，拯救不治，果真係人生無常。不過C夫人在世享受豐盛生活七十幾年（自懂事之日起計），一向優遊自在，婚姻美滿，兒孫滿堂，可謂福澤綿長，而今駕返瑤池，可說了無遺憾。
雖然不到教堂向C夫人告別，難免會想起89年六四。閱報得知，有樹仁大學學生寫文痛批支聯會係龜公龜婆之類，據說用詞激烈，令長年參加六四紀念人士好唔高興，呢位學生唔知有幾大年紀，想來應該係20歲左右嘅年輕人，對「前輩」不敬，不足為奇。左丁山一代搞學運時，西方嬉皮士學生不時咒罵三十歲以上嘅人應該快啲死，加上當時係文革高峰期，內地批鬥文字層出不窮，不知幾咁兇狠惡毒冇人性，遠非今天香港人可以想像。所以有學運老鬼問左丁山對樹仁一位學生嘅痛罵，有乜感覺，左丁山話：「一啲感覺都冇，𡃁仔學生未成熟，想到就罵，點會下筆時考慮及罵人用詞會引起迴響，我地呢輩，乜嘢罵人文字未見過。引用內地用詞，與呢位學生講認真，你便輸了。」年少學生有理想，有自傲，夠輕狂，不足為奇，最怕嘅係，呢類學生以後無進步，與思維永不長大，成世人嘅最大成就就係做學生會領導人，到四十幾五十歲還是要講自己做學生會時有幾威，還繼續幻想自己返回學校訓練新一代學生領袖，呢類人左丁山見過，都係在社會上比較難出頭一族，故此傾向返回母校向年輕人顯威風。
1989年左丁山正在精壯之年，自覺前途無限，那一年五月中還與新亞校友在天安門廣場漫步暢遊，觀察學生帳幕紮營，當然預料不到十幾日之後嘅場景，及有新亞兩位女校友（同是記者）遇險互相扶持嘅經歷。到了今天，就是一句老話，不願回憶，永不忘記，但不會讓六四陰影如魔鬼纏身，驅之不散，台灣二二八事件也有翻盤之日，六四，只是時辰未到而已，讀中國歷史，當知一百年係好短暫嘅。1279年，忽必烈完成吞金滅宋之偉舉，邊會想到蒙古帝國到咗1367年就俾朱元璋踢散呀？前後未夠90年啫。三百年後，點知道中國人點樣寫中華民國、中華人民共和國嘅歷史吖。
上一則: 燭光的故事 - 陶傑
下一則: 或許下一年六四 - 曾志豪
I
没有评论:
发表评论