【商界寒戰】一單deal買起前老闆 揭孫宏斌、柳傳志28載情仇
2016-09-21 20:54:00 HKT
孫宏斌人生大起大落，作風敢言，皆因佢冇有怕。
柳傳志可謂最傳奇民營企業家之一。
江湖流傳多年，聯想（992）柳傳志曾經對某位後生仔講過一番話：「我們都是能力強的人，我領導不了你。咱們好聚好散，聯想的分公司你隨便挑一個，你自己去幹。」信不信由你，但真係有一位後生仔把炮到如斯水平。
先講柳傳志，80年代發迹，喺一個乜都靠背景、靠關係嘅國度裡面，竟然可以成功冇父幹，赤手空拳打造一家聯想王國出來，當年絕對係奇蹟。佢係一位連日本人都敬畏三分、日劇都要影射為中國民企教父嘅人物。
至於另一位主角，佢旗下融創中國（1918）喺周日宣佈，斥資137.88億元人民幣，向前老闆柳傳志旗下聯想控股（3396）收購全部42項物業權益，佢就係...孫宏斌。唔講未必知，柳傳志故事夠傳奇，但其中一部份傳奇故事，就關於孫宏斌。
講返1988年，25歲嘅孫宏斌由清華大學碩士畢業，加入聯想，由普通員工做起，短短時間做到非凡業績，兩年內變成掌管聯想遍佈中國各地18家分公司嘅部門經理，被柳傳志一手提攜，更被傳將成為接班人。
一個集團，兩個叻到咁的人物，孫宏斌風頭一時無倆，內部自有功高蓋主嘅講法，時有傳言指有人想孫宏斌將分公司「獨立」出去。
據內地傳媒提及，當時柳傳志曾要求孫宏斌下放至分公司工作，以免孫在總部勢力過大，因此才流傳柳傳志開出條件「聯想的分公司你隨便挑一個，你自己去幹」，然後遭孫宏斌一口拒絕：「不必了柳總，我才26歲，我可以從頭再幹。」
條件傾唔成，同電影橋段差唔多，自然有一方要被擊倒，先至有戲做落去。1990年孫宏斌突然被公安拘捕，拘留兩年後的1992年，法院以「挪用公款13萬元」罪名，將孫宏斌判監5年。一位當時得令的人物，竟然因為13萬人仔斷送前途？喺中國呢一個國度，這些事，你懂的。
孫宏斌故事當然未完，佢冇咗聯想嘅搖籃，仲要踎埋監，都一樣阻唔到佢上位。1994年孫宏斌獲減刑提前出獄，向朋友借幾萬人仔成立順馳地產，柳傳志雪中送炭，再借孫宏斌50萬人仔。又一次證明，喺最有錢嘅人眼中，錢先係最重要，恩仇行埋一邊。對於柳傳志嚟講，幾十萬可以令孫宏斌唔向佢反咬一口，抵到爛。對於孫宏斌嚟講，最清楚自己能力同時有錢冇定使嘅人，非柳傳志莫屬，唔借佢錢借邊個？
喺2003年，北京法院撤銷孫宏斌當年挪用公款罪名，改判無罪。據內地媒體形容，孫宏斌當時在法院門口淚流滿面，師徒倆人恩怨，終於一筆勾銷。
喺柳傳志幫助下，孫宏斌1994年重出江湖，從此踏入「巨型上升軌」，他沒回到老本行，走到當時內地另一風口—房地產市場，創辦順馳，主力做中介服務（地產代理），唔知係咪避開同柳傳志正面交鋒。孫宏斌做生意，自然有佢突出嘅方法，孫極力慫恿開發商大量投入廣告，他再聘用大量大學本科生做銷售人員，令其生意與別不同，由行業中脫穎而出。
直到孫宏斌踩入地產開發業務，據指柳傳志管理嘅聯想仍然為孫與銀行牽線，助其項目發展。1998年，當時中國停止福利分房政策，人行亦取消個人住房的信貸限制，孫宏斌乘勢喺天津奪得一幅14萬平方米地皮，更傳獲得200%投資回報。
2006年的中國房市調控政策造成順馳資金斷鏈，無奈之下，孫宏斌將其苦心經營十幾年的順馳低價轉讓給路勁（1098）。對於曾經身陷囹圄嘅孫宏斌黎講，呢個只係上升軌途中嘅小調整，佢再由融創中國重新出發。雖然融創主力發展高端物業，但卻經常被批品質粗疏，直至公司在2014年計劃與一向做豪宅、精裝別墅的杭州房企綠城（3900）聯婚，雖然收購交易失敗收場，但孫宏斌學識取長補短，然後真真正正成為豪宅專家，在北京、上海大賣天價豪宅，邁向另一次成功。
由融創成立至今，短短十年左右，已成為中國房地產開發企業綜合實力第7名，截至今年8月的合約銷售額達781.3億元人民幣，去年純利32.9億元，市值200億元左右。
53歲嘅孫宏斌憑藉融創47.1%股權，賬面身家100億人民幣，2016年胡潤富豪榜排305位。至於72歲嘅柳傳志，身家是個謎，外界估計身家過千億。去到呢一刻，孫宏斌有本事將前老闆柳傳志手上，盡攬其房地產業務，故事的確夠勵志。
記者：黃尹華、方楚茵
掌握財經生活資訊，即Like「蘋果ATM」fb專頁啦！http://fb.com/appledailyatm
I
没有评论:
发表评论